السر في الغضروف.. أحمد جلال عبد القوي يكشف سبب تعاطيه للمخدرات

كشف الفنان أحمد جلال عبد القوي، لأول مرة تفاصيل رحلته مع الإدمان، وذلك خلال لقائه في برنامج كلام الناس الذي يعرض على شاشة قناة mbc مصر.

وقال أحمد جلال: أنا عملت عملية في ضهري ركبت 3 فقرات وهي كانت عملية كبيرة، وأنا بعمل العملية كنت ماضي على إقرار إن ممكن ممشيش تاني على رجلي، لما عملت العملية كان في أدوية مسكنة باخدها هي "مخدر" ودا كان العلاج الوحيد اللي ينفع.

وتابع: بقى عندي إساءة استخدام ليها، بعد ما كان العلاج المفروض يقف أنا موقفتش، خلاص الألم راح لكن بسبب الشعور بالسعادة والنشوة، بقى إدمان.

وأكد: قعدت 4 سنين، فترة علاجي استمرت سنة وشهرين لكن بعد كدا بقى سلوك إدماني، في الفترة دي كان أي دور بيجيلي وهاخد منه فلوس كنت بعمله بس مش في مصر، قلت بلاش اشتغل في مصر عشان محرقش نفسي، اشتغلت في لبنان عملت مسلسلين وعملت مسلسل في الأردن، اشتغلت في مسلسل كويتي كان فيه مصريين، الكوايتة اللغة بتاعتهم صعبة، أنا مكنتش ببقى فاهم بيقولوا إيه لكن رحت عشان الفلوس، كنت في الفترة دي مش عايز حد حواليا كنت منعزل وقاعد في فندق.